دنیا کی طاقتور ترین افواج میں پاک فوج کا 15 واں نمبر

بین الاقوامی ویب سائٹ گلوبل فائر پاورز نے دنیا کی بہترین افواج کی فہرست جاری کی ہے جس میں پاک فوج 15 ویں نمبر پر ہے۔ بین الاقوامی ویب سائٹ بزنس انسائیڈر کے مطابق گلوبل پاورز نے اس فہرست میں 137 ممالک کی افواج کو شامل کیا ہے اور ان افواج کی طاقت کا تخمینہ فہرست میں شامل ہر ملک کے ہتھیاروں، افرادی قوت، جیوگرافی اوررسد کی صلاحیت، اس ملک کے قدرتی وسائل اور مقامی انڈسٹریوں کے اعداو شمار کو مدنظر رکھتے ہوئے لگایا گیا ہے۔ تاہم ان ممالک میں جوہری ہتھیاروں کو شامل نہیں کیا گیا۔

نیٹو ممالک کو فہرست میں شامل کرتے ہوئے تھوڑا سا بونس دیا گیا ہے کیونکہ یہ ممالک اپنے جنگی وسائل کو شیئر کرتے ہیں، لیکن عمومی طورپر فہرست میں شامل ممالک کی موجودہ سیاسی اور ملٹری قیادت کو ایک فیکٹر کے طور پر شامل نہیں کیا گیا۔ ٹاپ پاور انڈیکس کا اسکور 0.0000 رکھا گیا ہے جو ناقابل حصول ہے۔ تاہم گلوبل فائر پاورز کے مطابق جو ملک ان نمبرز کے قریب ہو گا اس کی فوج اتنی ہی طاقتور ہو گی۔ اس معیار کے مطابق 25 ممالک کی افواج کو دنیا کی طاقتور ترین فوج قرار دیا گیا ہے۔